مَاتَعَرفْ شي عَن مُثَلَثْ بَرمُودا ط2 ، آجل تَعال فيذا { حل الواجب }

aboode · منذ /07-04-2011, 11:52 PM

بسم الله الرحمن الرحيم

كلنا سمعنا عن شي اسمه " مثلث برمودا "

بس بسألكم كم سؤال قبل نبدا

من منا اللي تعمق فيه وقرا عنه وشاف برامج ووش سووا العلماء ؟!

وابحاثهم طلعت بنتايج والا ؟!

الناس اللي اختفوا عرفوا عنهمم شي ؟!

وهل المكان هذا مسيطر عليه قوة انسانيه او قوة اكبر من قوة الانسان تثبت ضعف الانسان قدام القدره الربانيه ؟!

وش قالوا اهل الدين عنه ؟!

ببدا معكم حبه حبه

[ اوولا الموقع ]

ياطويلين العمر مكانهم عند البحر الاطلسي جنوب شرق مدينة فلوريدا الامريكية

وهذي صورة للمكان ، انتبهوا تروحون له

،،

[ ليش سموه بهالاسم ؟! ]
لأن اشهر ناس اختفوا فيه كانوا طالعين برحلة استطلاعيه على شكل مثلث مثل اللي بالصوره اللي حطيتها قبل

علمتكم ليه بالذات مثلث ، طيب ليه برمودا ؟!

لان هناك جزيره سياحية بهذا الاسم ، وبرضوا تلقونها بالصوره

،،

كثير من اللي قريته بالنت ببحثي عن هالموضوع يقول ان هذي الرحله اللي قلتها لكم هي اول وحده

وهذا غلط لان فيه رحلات كثير قبلها انفقدت

سفن ، بواخر ، ناقلات نفط ، ناس كاشتين بالبحر

نجي اللحين للي راحوا فيها مع هالمثلث

،،

[ حالات الاختفاء ]

1 / اول حالة بالسجلات كانت في كانون الثاني عام 1800 ، سفينة امريكيه عليها 340 رجال

2 / في نفس السنه في 20 آب اختفت سفينة امريكية اسمها ( بوكيغ ) < اسم دخان مب سفينة
وكان عليها 90 رجال

3 / 9 من تشرين الاول عام 1814 اختفت باخره اسمها ( واسب ) كان عليها 140 راقل

4 / وبعدها محد راح هناك الا بعد 10 سنوات ، في 28 تشرين الاول عام 1824
اختفت سفينة مدري باخرة اسمها ( القطة المتوحشة ) كان عليها 14 راقل

5 / بعدها محد راح الا عام 1880 ، يعني بعد 56 سنه
اختفت باخره اسمها ( اتلانتا ) وعليها 290 راقل

6 / وفي 1918 اختفت ( سكايلوب ) وكان عليها 309 راقل

7 / 1915 اختفت سفينة بحرية برازيلية اسمها ( سان باولو )
هذي بالذات صار عليها ازعاج
وجو اخواننا البرازيليين جندوا طيارات وسفن عشان يدورونهم لكن ماحصلوا شي

8 / الحادثه هذي هي اللي هزت امريكا
اللي هي لما اختفت غواصة امريكية اسمها ( سكوربيون ) وفيها 90 راقل

9 / الحاله اللي قلت لكم عليها الخمس طيارات
طبعا مسجل الكلام اللي كان بين برج المراقبه والطيارين
كانوا يقولون انهم فوق بحر ابيض وواحد يقول انا فوق كنسية لكن ماندري كم المسافه بينهم وبينها عشان يهبطون
ف لما انقطع البث ارسلت السلطات الامريكية
316 طيارة منها 76 حقت البحث عن قراشيع طيارات متكسره
وطيارات مغامرين وسفن صغار وكبار وقوارب سريعة زي حقت قراند وكذا
وسووا مسح على مسافة 380 ألف ميل
لكن مالقوا ولا شي ، حتى سترة نجاة ماحلصوا

10 / عام 1947 اختفت طياره موديل ( سي-45 ) وفيها 6 رجاجيل
كانت تطير برحلة عادية لكن مارجعوا الاخوان

11 / عام 1948 اختفت طيارة بريطانية اسمها ( ستار تايغر ) بطاقمها 6 اشخاص و 25 راكب
واللي كان يسوق بهم كان ظابط مميز بالحرب العالمية الثانية < هذا هو ضيعهم وش الفايده
لكن هذولا لقوا صناديق بنزين حق للطيارة نفسها ، لكن بعييييييييييييييييييييييي ييد عن مسار الطياره

12 / بنفس السنه 1947 طيارة من نوع ( دي-سي3 ) عليها 36 راكب
كانوا جايين من ميامي رايحين سان جوان
وبرضوا الطيارات والسفن سووا بحث على مسافة 300 ميل ومالقوا ولا شنطة من شنطهم

13 / عام 1949 برضوا طياره عليها 20 شخص لكن هذي سووا بحث على مسافة 50 ميل < طفشوا وهم يدورون

هذي كلها سفن وماسفن وطيارات

لكن الشي الغريب هي هذي الحلات

،،

[ حالات اختفاء غربية ]

1 / عام 1840 اختفوا البحاره وطاقم السفينة كله ، لكن السفينة موجوده

2 / 1855 برضوا اختفى طاقم سفينة

3 / 1881 باخرة نقل بضايع ، مافيها ولا ابن امه ، وكل البضائع بمكانها

4 / 1972 برضوا اختفى الطاقم وكل عفشهم محد جاه

5 / 1912 هنا لما وصلوا للسفينة لقوا انهم مجهزين الاكل بيبلعون ، بس مافيها احد

6 / 1940 اختفى الطاقم وقوارب النجاة كلها بحححححححح

7 / 1944 الطاقم مب موجود ، لكن لقوا كلب جايع < مابقى الا هو ليه ماخذوه <

اعداد كبيره صح

شي غريب جدددن

على قولة الفلم اللي شفته ( مثير للدهشه )

بسس فيه ناس طلعوا منها زي الشعره من العجينة

يعني جتهم مثل ماجا اللي اختفوا ، اشياء غريبة ومادري ايش لكن قدروا يطلعون منها

كل اللي اختفوا واللي طلعوا منها اتفقوا على شي واحد

ان السفينة او الطياره او اللي هو لما يقرب من ذيك المنطقه

البوصلة تدووور ماتثبت على مكان

بوصلة عاديه او كهرب او جارمن كل شي بيوقف ومارح تعرف طريقك

الاغلبية منهم قالوا انهم شافوا اشياء غريبة جدن فوق المكان هذا

يعني مثل اللي يقول انه شاف انفجار

واللي يقول انه شاف دوامة سحب

واللي يقول ان السحاب تشكل على شكل دائره بعدين تسكرت

ابد مثل السواليف حقت الفضاء وكذا

اتوقع من تفسيري الشخصي لها انهم جن ويحاولون يحسبون الناس لهالمكان بالاشياء اللي يسوونها لهم

لان اللحين الواحد اذا راح البر وفيه جن ، راح يتوهونه بالطريق

يخلونه يشوف طريقة لكن يوجهونه لمكان ثاني

< مجرد تفسير شخصي بعد ماقريت كل حاجه ، لاتاخذونه جد

وفيه تفسير ثاني اللي هو يقول ان فيه شركة امريكية بالمنطقة ذيك تشغل غواصات وكذا

وانها سببت موجه كهرومغناطيسية وكهربائية عشان كذا صارت هالحوسة

وانهم هم المتحكمين بهالمنطقة

والدليل انهم لما طلبوا من هالشركة مدري هالملحق العسكري لامريكا انهم يسوون مقابلات رفضوا

<< ماعجبني هالحكي

،،

[ ملخص البرنامج اللي شفته ]

اللحين برجع بكم لسالفة الخمس طيارات

لما اختفت الطيارات هذي ارسلوا على طول طياره وراهاا تبحث عنهم

لكن كلهم اختفوا ، ولما ارسلوا طاقم كامل يبحث لقوا بقعة زيت كبيره مررره

لو كان موجود بقعة زيت من طياراه ف معناه ان الطياره انفجرت

اذا كان انفجزت وزيتها منكب ع البحر ، وين بقايا الطياره ؟!

جو ناس علماء باجهزتهم وراحوا للمنطقة اللي فيها بقعة زيت ونزلوا الغواصين

لقوا شي تحت لكن مايدرون وش

يقولون بالبرنامج ان هالشي اللي تحت ممكن يكون طياره ، والسالفه راح عليها 60 سنه

اكيد تحللت ونبتت عليها نباتات البحر وكذا

حاولوا يعرفون وش هالشي ، هل هو حجر ، مرجان ، طياره ماعرفوا شي ورجعوا بيوتهم

الغريب في الموضوع ان احد الطيارين الخمسه هذولا

في تاريخ 27 من نفس الشهر اللي اختفوا فيه

هم اختفوا في تاريخ 5

في تاريخ 27 وصلت رسالة لبيت اهله مضمونها يقول " ان الرجال حي "

هذا الشي يا انه واحد يستخف دمه او انه صدق جد ، واذا صار جد هذا يعقد الموضوع مرره

لكن العقل والمنطق يقولنا اكيييد انه استهبال

رجاجيل بشنباتهم ضايعين من سنين بالنهاية يصيرون جالسين بمكان حيين

حتى بالافلام الهندية ماتصير

لكن ام الطيار هذي ، قالت انها متاكده مليار بالميه ان اللي كاتب هالرسالة ولدها

لانه الوحيد اللي يوقع باسم جورجي وهو اسمه جورج ومدري كم سبب بعد

وماتت الام وهي تعتقد ان ولدها مازال على قيد الحياة

الخلاصه يعني انهم ماحصلوا ولا شي عن المفقودين ولا اي دليل يدلهم عليهم

،،

[ رواية الشيخ الدكتور عائض القرني ]

كلام كثييييير

باختصره لكم وان شاء الله توصلكم الفكره

ابليس حط له هدف معين اللي هو ذرية آدم وحوا ، كان هذا هدفه عشان يطلع شره ويبسط نفوذه وقواه ويسيطر على الحياة

ويظهر شكله للعن

لكن هو تجنب آدم وحوا لان كان ايمانهم قووي بعد توبتهم لما نزلهم الله من الجنة

ف انتظر ابليس لما مات آدم وحوا

لما ماتوا طلع ابليس بشكله الحقيقي ومعه الجن والمردة والغيلان عشان يبسط نفوذه على الحياة

لكن قدرة الله فوق كل شي ، وشاء الله ان الانس ينتصرون عليهم ، والله نصر الانس برجل عظيم اسمه ( مهلاييل )

وبهذي المواجهه مهلاييل قتل كثير من الجن والشياطين وانحاشوا هم عاد لمنطقة ثانيه

طبعا كل هالكلام ماخوذ من كتاب ( البداية والنهاية لابن كثير )

بعد ما انهزم ابليس واتباعه جا مهلاييل واسس مدينتين وحط فيهم جيش كان اول جيش انسي

ف ابليس والمجموعه اللي خسروا معه راحوا يدورون لهم مكان بالارض يجلسون فيه

عشان يأسسون لهم عرش جديد ويكون بعيييد عن الانس

ف اختار هذا المكان اللي يسمى بمثلث برمودا

استغل ابليس قوة الجن الخارقة عشان يبني المملكة حقته ، واهم قدراتهم الخارقه تصلح مع طبيعة البحر

والدليل بالقران الكريم : { والشياطين كل بناء وغواص } آية 37 سورة ص

قال الرسول صلى الله عليه وسلم : " إن الشيطان يضع عرشه على الماء ، ثم يبعث سراياه في الناس ،
فأقربهم عنده منزلة أعظمهم عنده فتنة ، يجيء أحدهم فيقول : ما زلت بفلان حتى تركته وهو يقول كذا وكذا ،
فيقول إبليس : لا والله ما صنعت شيئاً ، ويجيء أحدهم فيقول : ما تركته حتى فرقت بينه وبين أهله ،
قال : فيقربه ويدنيه ويقول : نعم أنت " رواه مسلم

وابليس عنده الثعابين لها مكانه خاصه عشانهم ساعدوه في خروج آدم وحوا من الجنه

عشان كذا صاروا المقربين لعرشه في مسند أبي سعيد :
عن أبي سعيد أن رسول الله صلى الله عليه وسلم قال لابن صائد : " ما ترى " ؟!
قال : " أرى عرشاً على البحر حوله الحيات " ،
فقال رسول الله صلى الله عليه وسلم : "صدق ذاك عرش إبليس "

والله اعلم

اتمنى ان اللي جبته لكم يكون واضح واكون وضحت لكم لو جزء بسيط عن مثلث برمودا

وان شاء الله ان جميع الاسئله اللي قلتها بالبداية جاوبنا عليها

في اشياء كثير تجاهلت اني اقولها لاني اتوقع انها سخافات

وذكررت لكم الشي الاقرب للعقل والمنطق

شكرن لكم

ممآآ رآأٌق ليٌٌ